TurkLang  

Түүр тылларын көмпүүтэргэ таҥастыырга анаммыт «TurkLang 2019» VII-с аан дойдутааҕы кэмпириэнсийэ

Ытыктабыллаах кэллиэгэлэрбит!

Түүр тылларын көмпүүтэргэ таҥастааһыҥҥа аналлаах “TurkLang 2019” норуоттар икки ардыларынааҕы VII кэмпириэнсийэ 2019 сыл алтынньы 3-5 күннэригэр Симферополь куоракка (Кырыым, Арассыыйа) буоларын туһунан үөрэн-көтөн туран иһитиннэрэбит.

Кэмпириэнсийэ үлэтин хайысхалара:

  • Түүр тылларын тутулун оҥкула
  • Көмпүүтэр тиһиктэрин төрөөбүт тылга тылбаастааһын уонна көмпүүтэр тиэрминнэрэ
  • Түүр тылларын элэктириэн куорпустара
  • Тиэкис морполуогуйатын уонна сиинтэксиһин таҥастыыр тиһиктэр
  • Саҥарар саҥаны өйдүүр уонна сиинтэстиир тиһиктэр
  • Тиэкиһи тыл суолтатыгар олоҕуран таҥастыыр тиһиктэр
  • Массыына тылбааһын тиһиктэрэ
  • Түүр уонна омук тылларын үөрэтэргэ туһуламмыт өркөннөөх тиһиктэр уонна ньыматыктар
  • Түүр тылларын лиҥкибиистикэ өттүттэн тойоннооһун
  • XXI үйэ билимин чэрчитигэр түмэти үөрэтэр лиҥкибиистикэ чинчийиилэрэ

Сүрүн болдьохтор:

Ыстатыйа кылгас ис хоһоонун ыытыы от ыйын 1 күнүгэр диэри
Ыстатыйа толору тиэкиһин ыытыы балаҕан ыйын 1 күнүгэр диэри
Сыанабыл түмүгүн билиһиннэрии балаҕан ыйын 20 күнүгэр диэри
Кэмпириэнсийэ бырагырааматын бэчээттээһин балаҕан ыйын 25 күнэ
Кэмпириэнсийэни ыытыы алтынньы 3-5 күннэрэ

Кэмпириэнсийэ бырагырааматыгар сүрүн мунньахтар, төгүрүк остуоллар, көмпүүтэр бырагыраамаларын сүрэхтиир тэрээһиннэр киирэллэр.
Кэмпириэнсийэ иһинэн “Түүр тылларын элэктириэн куорпустарыгар туттуллар бэлиэлэр тиһиктэрин биир иигэ киллэрии” UniTurk уочараттаах сэминээрэ буолуоҕа.
Кэмпириэнсийэҕэ киирбит уонна сыанабылы ааспыт үлэ барыта кэмпириэнсийэ матырыйаалларыгар уонна http://www.turklang.tatar ситим сиргэ бэчээттэниэ.
Сыанаһыттар биһирэбиллэрин ылбыт бастыҥ дакылааттар «Таврический вестник информатики и математики» уонна «Ученые записки КФУ» сурунаалларга бэчээттэниэхтэрэ.

Кэмпириэнсийэ тыла

Кэмпириэнсийэ ааҥыл, нуучча уонна кырыым татаардарын тылларынан үлэлиэ.
Көрдөрүк ааҥыл тылынан суруллубут буолуохтаах.